Түркістанда биылғы Наурыздың жөні бөлек. Ерекше мәртебеге ие болған қалада қос қуанышты атап өту жоғары деңгейде, салтанатымен ұйымдастырылды. Түркістанның тарихи және мәдени маңызын одан әрі арттыратыны сөзсіз. Күллі түркі әлемі үшін орталыққа айналып келе жатқаны бұл Наурызда айқын көрінді. Халықтың қарасы қалың болды.
Келген арнайы қонақтар, ҚР Парламенті Мәжілісінің депутаттары, зиялы қауым өкілдері, облыс басшылығы, тұрғындар бәрі-бәрі серпіліп қалды. Тек өңір көлемінде емес, халықаралық деңгейді қамтыды. Туристік шаһарға ағылған саяхатшылар мәдени құндылықтармен танысқаны сөзімізге дәлел.
«Қош келдің, әз Наурыз!» мерекелік іс-шарасында облыс әкімі Нұралхан Көшеров жұртшылықты мейраммен құттықтап, ізгі тілегін арнады. Мемлекет басшысының «Түркістан қаласының ерекше мәртебесі туралы» заңға қол қоюы мен статусты иеленуіне тоқталып, отандастарды қолдауға шақырды.
Светлана Айтпаева бастаған Қазақстанға белгілі әртістер мен аймақтың өнерпаздары мерекелік көңіл-күй сыйлады. Эстрада жұлдыздарының қатысуымен «Ән мен әнші Түркістан төрінде» атты концерттік бағдарламасына ұласты.«Наурызнама» онкүндігі аясындағы думан 23-не дейін жалғасады.
